السيـــر والمغـــاط فــي معنــى كلمــة هيــاط

بسم الله الرحمن الرحيم
السلام عليكم ورحمة الله وبركاته
مساكم الله بالخير يالشيون والشينات

الي عنده شغل يرعص رجوع ويروح ترى ماعندي شي بس ابخرط عليكم شوي والي ماعنده شغل

وراه ماعنده شغل ؟
ورى مايصير عنده شغل ؟
وشوله قولوا لي ؟

أنتم ماتدرون إن الي ماعنده شغل ويجلس تسذا فاضي يمكن يتعرف على صديق سوء والا صديقة سوءة << يسمع بالمؤنث
يمكن وانت هالحين جالس فاضي لا شغل ولا مشغله ماتدري الا يمرك صديقك فهد << حاقد على اي واحد اسمه فهد
المهم يمرك ويدق عليك بالجوال يعني اطلع عند الباب همن تجي تبي تطلع وأمك تمسك ثوبك
وتقول :لا .. لا .. لا يابُني لاتخرج مع اصدقاء السوء
وانت تقول :لا.. سوف أخرج .. ألا تعلمين أن فهد معه كامري الفين وسبعة وجوال (إن 73 ،N73 )
أمك وهي متعلقتن بثوبك : أرجوك ياولدي لاتخرج << تكفون صيحو
أنت : اتركينن دعينن أخرج مع صديق عمري أيتها العجوز
مير تفلت منها وتطلع وترتسب مع صديقك فهد وأمك دمعته على خده همن يروح بك فهد للمقاهي الي عند
كبري الفحص وتخبرون انتم ان هاك المنطقة قريبة من مدرج مطار الملك خالد والطيارات اذا جن يوقعن يمرن
من فوق المقاهي عشان يوقعن على المدرج المهم وأنتم جالسين تشيشون وتناظرون التفزيون ماتدرون الا الطيارة
شاقتن أم الجدار حق المقهى وداخلتن عليكم همن تدهمتسكم كلكم الاكم من صيد امس .
وأنت يالشيفة لا تعرفين على صديقات السوء ماتدرين يمكن من كثر المكالمات والسواليف الي على الفاضي تنفجر
الطبلة ما ادري الطار الي بإذنتس أو يمكن تخرب الاذن الي بجنب الاذن الوسطى
والا يمكن يجيتس غرغرينة بأصبعتس السبابة حق يدتس اليسرى من كثر ماتدخلينه بخشمتس أثناء المكالمة لامنتس بغيتي تفكرين

8
8

قايل لكم الي عنده شغل يتوكل على الله

المهم

يالله صفوا وانتبهوا زين لا احد يلتفت والا يكحكح ترى الشاحن بيدي والله اني لو اسمع تسلمه والا شي اني لأوسط الشاحن
بجبهة الي حتسى خلونا نعلمكم يا مال الوهم وكما قال الشاعر:

العلم زينن والشمسُ ساطعتن ××× والعنزُ باكيتن وأنتم ولا تسلمه
والله لو أسمع أحدن حاتسيون ××× بيجيه شاحن مع بقسن ولكمه

السير والمغاط ... بشرح معنى كلمة هياط

تسثيرن من الناس يسمع عن تسلمة (هياط أو مهايط أو يهايط أو مهايطي ) ولكن مايدري وش معناها بالضبط
والحين ابشرحه شرح قصير جدا ان شاء الله مع التمثيل بالصور والفيديو << والله من الفضاوة

قال العلماء : هايطَ يهايطُ مهايطةً فهو مهايطي وهي مهايطية ومعنى الهياط في اللغة : الصياح،
قال ابن منظور في كتابه (لسان العرب ):"والهِياطُ والمُهايطةُ: الصِّياح والجَلَبة" << قسم بالله صدز

أما تعريف الهايط اصطلاحا : هو فعل الشي والمجازفة الخطرة بقصد التميلح.

وينقسم الهياط الي قسمين :

1-هياط عملي
2-هياط قولي

شرح أقسام الهياط بالتفصيل :

أ- الهياط العملي

تعرف الهياط العملي :وهو المجازفة والمغامرة الخطرة بقصد التميلح والاستعراض .

اذكر مرة العيال كانوا جالسين بالشارع الا فيه ولد صغير اسمه عبدالله يمكن عمره 12 سنة واقف على جدار بيتهم
المهم قام واحد من العيال مقلع
قال : ايوه شوفوا عبدالله القوي هالحين بيطب من الجدار
المهم الخبل عبدالله طب من الجدار على الشارع واول ما طاح وهو يصرخ هاك الصرخة ويجون العيال ويقومون
ويروحون ويدخلون بيت واحد من العيال ويتكون بالملحق ويفلونها بولت
يوم جاء من باتسر لقوا عبدالله جالس عند بابهم ورجله مجبصة لما الركبة
ومشكلة هالنوع من الهياط إن عواقبة وخيمة يعني يمكن يموت المهايطي اثناء عملية الهياط مثل الي يطلعون بوجه المفحط
وهو ناطل السيارة على البيبان ويمشي ميتين

أمثلـة علـى الهيـاط العملـي:

السيـــر والمغـــاط فــي معنــى كلمــة هيــاط 4bfdda30c6

السيـــر والمغـــاط فــي معنــى كلمــة هيــاط 4bfdda30c6

ذا زول مسوي فاهم وقاعد يهايط إنه يعرف يطرح البكرة << الناقة لاصارت بثاني متوسط
يعني بالله وش بيستفيد اذا شال ناقتن عذراء بعز شبابه وصبخ به بالارض بس الهياط مشكلة

للتحميــل ارعـص هنــا

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

ب- الهياط القولي

تعرف الهياط القولي :وهو مدح النفس بشي ماصار أو إدعاء ملكية شي أو التزهل بأمر ماهوب قده .

يعني مثلا الواحد يمدح نفسه وهذي واضحه أو إنه يدعي إنه يملك مثلا سيارة غالية أو وحدة تدعي إن عندها عقد ألماس
أو إن الواحد يدعي إنه يعرف شخصيات مهمة
ويكثر هذا النوع من الهياط عند الحريم والبزران من سن التاسعة الي السادسه طعش
ماعمرك سمعت بزر يقول ابوي اقوى من ابوك والا سيارتنا ازين من سيراتكم ترى ذا الهياط القولي

أمثلـة على الهيـاط القولـي:

السيـــر والمغـــاط فــي معنــى كلمــة هيــاط 31e6104065

ذا هندي مهايطي مسوي راعي مرجلة وعلوم رجال وقصيد
للتحميل ارعص هـنا

هـذا واللهـ تعالـى اعلـم وصلـى اللهـ على سيـدنـا محمـد

واتمنى ممن عنده درس عن المفردات المعاصرة كالهياط ان يفيدنا مشكورا

ويــن الــردود.؟.؟.؟,..؟. confused

بيض الله وجهك
وجعل ما كتبته درس للمهايطين

هههه
بارك الله فيك والله يبعدك عن الهياط وترا الهياط مايعيش

الله يسمع منك

ااحم
انا مهـايطي.؟
وشسمه ان شاء الله الموضوع كان مفيد

المعذره لا يكون زعلت منه

ههه
ليش ازعل.؟
هذا مزح بالعكس استانست
تسلم

ليش تعدل مشاركتك.؟
الرسميات الكثيرة مو مطلوبة بالمنتدى خلنا نتونس....نمزح شوي

أخاف يكون مزحي ثقيل عليك

ســلامـات...ماعلييك متعود ع المـزح حتى الثقيل..
اسأل احمــد عنـي

أجل أستقبل ما يتيك
وش عرفك بأحمد

كل اللي يجي منك على الرحب والسعة
ماقالك ان هذا منتدى صديقي.؟

أنت صالح العامر

اي نعم...انا هو

انت المرسل لي رسالة يوم العيد على بالك اني أحمد
لاني اتصلة على أحمد وسالته وقال اعرفه

ايوووه... الحمدلله وصلت الرسالة
جـزاك الله خير
وبالنسبة لنشر المنتدى طالع عدد الزوار
اضفت المنتدى في عدد من المتصفحات غير جوجل

جزاك الله خير على أضفته

وإيــاكـ.........

كم عدد الزوار المطلوب حتى تنشر المنتدى
لا يكون 100

لا مايطلب عدد معين

بالنسبة لنشر
لماذ لا تضيفه لبعض المنتديات
يضفونه لك مجانا
او تنزيل بعض المشاركات في بعض المنتديات ويلزمه الدخول إلى المنتدى

ماادري عن المنتديات انا صراحة ماادخل منتديات كثير
بالنسبة للاضافة المجانية مااعرف طريقته صراحة
لو تكرمت واضفته اذا مافيه مانع.. ولا نبي نتعبك

سلامات ما اتعبتني
وإذا كان في تعب فهو يفداك ويفد المنتدى
ونحنو نقوم بأي امر من صالح المنتدى
لا يخطرني الان منتدى معين ولك سابحثلك واردلك خبر

احرجتنـي وكل اللي اقدر اقولك:
قال صلى الله عليه وسلم: (مَنْ صُنِعَ إِلَيْهِ مَعْرُوفٌ فَقَالَ لِفَاعِلِهِ : جَزَاكَ اللَّهُ خَيْرًا ، فَقَدْ أَبْلَغَ فِي الثَّنَاءِ)
مانقدر الا على جـزاك الله خير
فـجـزاك اللهـ خير

وإياك
ترى ما سوينا شى بحقك
لان هذا واجب علينا